Առողջապահության նախարար Արմեն Մուրադյանը կառավարության երեկվա նիստից հետո լրագրողներին վստահեցրեց, որ բոլոր վիրավորների մոտ դեպի դրական տեղաշարժ կա, բոլորը գտնվում են խիստ ուշադրության կենտրոնում, ապահովված են թե՛ դեղորայքով, թե՛ նեղ մասնագիտական օգնությունով։ «Միայն մեկ ծայրահեղ ծանր վիճակում գտնվող հիվանդ ունեինք, ով գլխուղեղի վնասվածք էր ստացել, եւ հուրախություն մեզ, նրա մոտ երեկվանից դրական դինամիկա է գրանցվում, հուսով ենք, որ ամեն ինչ լավ կլինի»,— ասաց նախարարը։

Լուծված է նաեւ Արցախում վիրավորվածների տեղափոխման հարցը։ Վերջին 5 օրվա ընթացքում առողջապահության նախարարությունը շուրջօրյա ռեժիմով է աշխատում, եւ կարելի է ասել, որ այդ խնդիրն ամբողջությամբ լուծում է ստացել։ «Կան մարդիկ, ովքեր իրենց տրանսպորտային միջոցներն են առաջարկել։ Թեեւ լիովին կարող էինք առկա միջոցներով իրականացնել տեղափոխումը»,–նշեց նախարարը։ Նա հավելեց, որ աչքերի վնասվածքով վիրավոր կար, ում վիճակն արդեն բարելավվում է։ Կան հիվանդներ էլ, որոնք նեղ մասնագիտական ծառայություններ են ստանում քաղաքացիական հիվանդանոցներում։ Նրանց վիճակը բավարար է։

Այս օրերին Արցախին շատ են ցանկացել աջակցել հայ բժիշկները ԱՄՆ—ից եւ Ռուսաստանից։

Այս օրերին նաեւ արյան պակաս չի զգացվել։ Արյուն հանձնել ցանկացողներն այնքան շատ էին, որ մի պահ նույնիսկ իրավիճակը զսպելու փորձ եղավ։ Նախարարը հայտնեց, որ ոչ ոք իրականում իրավունք չունի զսպել քաղաքացիների կողմից դեղերի հավաքումը կամ արյան հանձնումը։ Առողջապահության նախարարությունն ընդամենը պիտի լավագույն եղանակով կազմակերպի այդ գործընթացը։ Այժմ էլ պահուստները թեեւ բավարար են, բայց արյունաբանության կենտրոնը շարունակում է աշխատել։ «Կարծում եմ, որ արյան հանձնումն ընթանում է բարձր մակարդակով, կենտրոնական զորամասային հիվանդանոցի հետ համագործակցությամբ»,–ասաց Արմեն Մուրադյանը։

Ա. ՄԵԼՔՈՆՅԱՆ