Դեղերի նկարագրություն
Արդյունավետ համագործակցության փորձ
Հայաստանում է ԱՀԿ եվրոպական տարածաշրջանային գրասենյակի ղեկավար Ժուժաննա Յակաբը։ ՀՀ առողջապահության նախարար Արմեն Մուրադյանի հետ հանդիպման ժամանակ նա երեկ ներկայացրել է ԱՀԿ հայաստանյան գրասենյակի նոր ղեկավար Եգոր Զայցեւին։ Հանդիպման ընթացքում քննարկվել են համագործակցության հետագա աշխատանքները, անդրադարձ է կատարվել համատեղ իրականացվող ծրագրերին։ «Մեզ համար մեծ պատիվ է ընդունել Ձեզ մեր երկրում։ Հայաստանն ու ԱՀԿ—ն երկարամյա եւ շատ արդյունավետ համագործակցության փորձ ունեն»,–ողջունելով բարձաստիճան հյուրին՝ նշեց Արմեն Մուրադյանը։ Նրա խոսքով՝ Ժուժաննա Յակաբի այցի նպատակն է առաջին հերթին գնահատել առողջապահական նոր մարտահրավերները, մշակել հետագա համագործակցության գերակա ուղղությունները։ԱՀԿ եվրոպական տարածաշրջանային գրասենյակի ղեկավարը նշեց, որ տպավորված է Հայաստան կատարած այցով։ Ժուժաննա Յակաբը եւս մեկ անգամ ընդգծեց 2016թ. մայիսին Ժնեւում կայանալիք ԱՀԿ հերթական՝ 69—րդ վեհաժողովի կարեւորությունը, որին ՀՀ առողջապահության նախարարն հրավիրված է մասնակցելու որպես փոխնախագահ հենց նրա կողմից։ «Ողջունելի եւ օրինակելի են այն հաջողությունները, որոնք գրանցել է Հայաստանը պատվաստումների, ոչ վարակիչ հիվանդությունների, ՄԻԱՎ/ՁԻԱՀ—ի, տուբերկուլոզի դեմ պայքարի, մայրական եւ մանկական ցուցանիշների նվազեցման, ինչպես նաեւ այլ ոլորտներում»,–շեշտեց Ժուժաննա Յակաբը։
Նա հանգամանալից անդրադարձ կատարեց նաեւ առողջապահության ոլորտում մեր երկրի արձանագրած հաջողություններին, ձեռքբերումներին, խոսեց նաեւ հետագա անելիքների եւ ԱՀԿ—ի կողմից իրականացվող բարեփոխումների մասին։
Կարեւորվեց ծրագրերի արդյունավետ իրականացումը եւ միջգերատեսչական համագործակցությունը, համալիր մոտեցումների կիրառումը։
Քննարկման առանցքում էին մոր եւ մանկան առողջության պահպանման շարունակական բարելավման, մահացության ցուցանիշի կրճատման, վարակիչ հիվանդությունների դեմ պայքարին, ոչ վարակիչ հիվանդությունների կանխարգելմանը եւ վերահսկմանը վերաբերող հարցեր։
Կողմերն անդրադարձան նաեւ շրջակա միջավայրի առողջապահական ռիսկի գործոնների ազդեցությունը կրճատելուն ուղղված միասնական հսկողական համակարգի եւ ընդհանուր հանրային առողջապահության համակարգի ստեղծման, Հայաստանի բնակչության իրական կարիքներին արձագանքող արդյունավետ առողջապահական համակարգի կարողությունների զարգացման, դեղերի՝ հակաբիոտիկների ռացիոնալ օգտագործման, ինչպես նաեւ մի շարք այլ հարցերի։
Նշվեց, որ համագործակցության գերակայությունները երկու կառույցների միջեւ ընտրվել են՝ հաշվի առնելով հանրային առողջապահության ոլորտի ներկայիս հիմնահարցերը եւ առողջապահության համակարգի գործունեության բարելավմանն ուղղված ընթացիկ ազգային միջոցառումները։
Հայաստանն Առողջապահության համաշխարհային կազմակերպության անդամ է 1992 թվականից։ ԱՀԿ հայաստանյան գրասենյակը հիմնադրվել է 1994թ.։
ՀՀ առողջապահության նախարարության եւ ԱՀԿ—ի միջեւ համագործակցությունն ընթանում է 1994 թվականից ի վեր։ ՀՀ առողջապահության նախարարությունը եւ Առողջապահության համաշխարհային կազմակերպության եվրոպական տարածաշրջանային գրասենյակն իրականացնում են թվով 12—րդ երկամյա համագործակցության ծրագիրը։
Հանդիպումից անմիջապես հետո Արմեն Մուրադյանը եւ Ժուժաննա Յակաբը պատասխանեցին լրագրողների հարցերին։ Հանրային առողջապահական ծրագրերի իրականացման, հանրային կարծիքի ձեւավորման եւ տարբեր ծրագրերի շուրջ հանրության իրազեկվածության բարձրացման գործում մեծապես կարեւորվեց ԶԼՄ—ների դերը։
