Իրկուտսկում 41 մարդ է մահացել լոգանքի համար նախատեսված կոնցենտրատը խմելուց հետո

Ռուսաստանի Իրկուտսկ քաղաքում 41 մարդ է մահացել լոգանքի համար նախատեսված և ալկոհոլ պարունակող «Боярышник» կոնցենտրատը խմելուց հետո: Այդ մասին հայտնում է ТАСС-ը՝ վկայակոչելով Ռուսաստանի քննչական կոմիտեին: Ավելի քան երկու տասնյակ մարդ գտնվում է հիվանդանոցում՝ ծանր վիճակում:

Ինչպես հայտնել է գերատեսչության ներկայացուցիչը՝ թունավորումից, ընդհանուր առմամբ, տուժել է 54 մարդ: Բժիշկների խոսքերով՝ թունավորվածների մեծ մասը հիվանդանոց են տեղափոխվում՝ գտնվելով կոմայի մեջ:

Ինչպես հայտնել են Քննչական կոմիտեում, պարզվել է, որ քաղաքի թաղամասերից մեկի բնակիչները ձեռք են բերել «Боярышник»-ը, որի վրա նախազգուշացում է եղել այն ներքին օգտագործման համար նախատեսված չլինելու մասին:

«Չնայած նախազգուշացմանը՝ քաղաքացիներն այդ արտադրանքը կիրառել են որպես ալկոհոլային խմիչք, սակայն դրա մեջ եղել է կոնցենտրացված մեթիլային սպիրտ՝ էթիլայինի փոխարեն»,- նշել են Քննչական կոմիտեում:

Դեպքի առիթով հարուցվել է քրեական գործ: Քննիչները ոստիկանության աշխատակիցների հետ խուզարկումներ են անցկացրել առևտրի կետերում, որտեղ ձեռք է բերվել այդ հեղուկը: Շրջանառությունից հանվել է այդ միջոցի ավելի քան 2 հազար շիշ՝ ավելի քան 500 լիտր ծավալով: