Իտալացի դեղագետները վերջերս բացահայտել են շուրջ երկու հազար տարի առաջ` Տոսկանայի ափի մոտ խորտակված նավի վրա հայտնաբերված դեղահաբերի բաղադրությունը: Proceedings of the National Academy of Sciences ամսագրում հրատարակած հոդվածում նրանք հայտնել են, որ դեռ 2000 տարի առաջ օգտագործվել են աչքերի հիվանդության դեմ դեղահաբեր:

1974 թվականին հայտնաբերված նավի վրա, որը խորտակվել էր մ.թ.ա 130-ական թվականներին, հայտնաբերվել է հնադարյան «դեղատուփը», որտեղ պահվում էին բժշկական նշանակության տարբեր անոթներ,գործիքներ, ինչպես նաև` հաբեր:

Գիտնականները պարզել են, որ բոլոր հաբերը բուսական ծագման են` գազարից, վայրի սոխից, կաղնուց, կաղամբից և այլ բույսերից պատրաստված խառնուրդից: Ենթադրվում էր, որ հաբերն օգտագործվում էին որպես նավաստիների սննդի հավելումներ:

Բացի այդ ` պահպանվել են նաև ցինկի բաղադրությամբ ավելի խոշոր դեղահաբեր: Իտալացի գիտնականները ենթադրում են, որ դրանք օգտագործվում էին ակնաբուժական նպատակներով: