ԵՊԲՀ—ի հրավերով եռօրյա այցով Երեւանում գտնվող Հորդանանի արքայադուստր, Քաղցկեղի վերահսկման միջազգային միության նորընտիր նախագահ Դինա Մայրեդի բժշկական հաստատություններ այցելությունները վաղ առավոտից մեկնարկել են «Մուրացան» հիվանդանոցային համալիրից։ Այս մասին տեղեկացնում են ԵՊԲՀ—ի լրատվական ծառայությունից։

Դինա Մայրեդին ներկայացվել են քիմիաթերապիայի կլինիկայի եւ այլ բաժանմունքների հնարավորություններն ու հագեցվածությունը։ Արքայադուստրը զրուցել է բուժանձնակազմի եւ պացիենտների հետ։

Դինա Մայրեդի կապը քաղցկեղի դեմ պայքարի հետ ունի իր պատճառը։ Նրա տղայի մոտ, ով արդեն համալսարանում է սովորում, երկու տարեկանում քաղցկեղ էր հայտնաբերվել։ Արքայադուստրը, ներկայացնելով իր օրինակը, ընդգծել է, որ հատկապես սկզբնական փուլում հիվանդության դեմ պայքարը դյուրին չէ, բայց այն հաջողվել է հաղթահարել՝ շնորհիվ չնահանջող պայքարի։

«Բոլոր մայրերի համար դժվար է, երբ երեխան քաղցկեղ ախտորոշումն է ունենում, եւ ես որեւէ բանով չեմ տարբերվել եւ ունեցել եմ բոլոր այն խնդիրները, որոնք ունենում են ծնողները նման դեպքերում»,–նշել է Դինա Մայրեդը։

ԵՊԲՀ ռեկտոր Արմեն Մուրադյանի խոսքով՝ բժշկական համալսարանը նախաձեռնողականություն է դրսեւորել միանալու արքայադստեր ղեկավարած՝ քաղցկեղի դեմ պայքար իրականացնող UICC կազմակերպությանը։

Աշխարհի խոշոր այս կառույցը՝ UICC—ը, միավորում է 155 երկրի 950 կազմակերպություն։ Ռեկտորի գնահատամբ՝ կարեւոր է, որ չարիք հանդիսացող այս հիվանդությունը հաղթահարելիս՝ աշխարհի բոլոր երեխաներն ունենան հավասար պայմաններ։

Այցի ընթացքում Դինա Մայրեդը սեփական փորձով լավ հասկանալով քաղցկեղի դեմ պայքարի բարդությունները՝ ոչ միայն քաջալերում էր ծնողներին՝ ներկայացնելով հիվանդության բուժման հուզական կողմը, այլեւ խոսում էր բուժման նորագույն հնարավորությունների մասին, որոնք առկա են այսօր Հայաստանում։

Քաղցկեղի վերահսկման միջազգային միության նախագահն այցելել է նաեւ ՀՀ ԱՆ Ռ. Հ. Յոլյանի անվան արյունաբանական կենտրոն, շրջել է բաժանմունքներում։

Այնուհետեւ, «Հերացի» ավագ դպրոցում մասնակցել է ծառատունկի, ինչպես նաեւ ներկա գտնվել «Իզմիրլյան» բժշկական կենտրոնի ուրոլոգիայի բաժանմունքին լազերային նորագույն սարքի նվիրատվության միջոցառմանը։

Նշենք, որ այսօր ԵՊԲՀ—ում կմեկնարկի քաղցկեղը հաղթահարած մարդկանց նվիրված կոնգրեսը, որին նա հանդես կգա «Քաղցկեղը վարակիչ չէ, սերն է վարակիչ» թեմայով զեկույցով։