ՀՀ առողջապահության նախարարության աշխատակազմի Հանրային առողջության բաժնի պետ Քրիստինա Գյուրջյանը և ՀՀ ԱՆ Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնի փոխտնօրեն Լիլիթ Ղազարյանը մասնակցել են Առողջապահության համաշխարհային կազմակերպության (ԱՀԿ) Եվրոպական տարածաշրջանային գրասենյակի կողմից կազմակերպված հակամանրէային դեղերի պատշաճ կիրառման հարցերին նվիրված աշխատաժողովին, որտեղ ներկայացրել են հակամանրէային դեղերի նկատմամբ կայունության զարգացման դեմ պայքարում Հայաստանի փորձը:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, 2015 թվականի հուլիսի 8-ին ՀՀ կառավարությունը հավանության է արժանացրել Հակամանրէային դեղերի նկատմամբ կայունության հսկողության և կանխարգելման ռազմավարությունը, որի իրագործման շրջանակներում ձևավորվել է միջգերատեսչական համագործակցության հանձնաժողով, կատարելագործվում է համաճարակաբանական հսկողության համակարգը, իրականացվում են մասնագետների շարունակական ուսուցման և բնակչության իրազեկվածության բարձրացման միջոցառումներ, ներդրվում են հակամանրէային դեղերի նկատմամբ կայունության մշտադիտարկման մեխանիզմներ:

Հակամանրէային դեղերի չարաշահումը, դրանց թերի և ոչ նպատակային կիրառումը կայունություն առաջացնող գործոններ են: Այդ պատճառով հիմնախնդրի մասշտաբների գնահատմանն ու դրա լուծմանն ուղղված առաջին քայլը հակամանրէային դեղերի սպառման, ինչպես նաև դրանց նկատմամբ մանրէների կայունության միտումների ուսումնասիրությունն ու քարտեզագրումն է: Այդ առումով նշանակալի է ՀՀ ԱՆ դեղերի և բժշկական տեխնոլոգիաների փորձագիտական կենտրոնում հակամանրէային դեղերի կիրառման մշտադիտարկման համակարգի ստեղծումը, որը հնարավորություն է ընձեռում քանակական և որակական ինդիկատորների միջոցով բացահայտել հակամանրէային դեղերի կիրառման օրինաչափությունները, իրականացնել կայունության հետ դրանց կապի վերլուծություն, ձեռնարկել բարելավման միջոցառումներ և գնահատել դրանց արդյունավետությունը:

ԱՀԿ աջակցությամբ հակամանրէային դեղերի մշտադիտարկման ռեգիստրներ ստեղծվել են նաև եվրոպական տարածաշրջանի ևս 17 երկրում (Եվրոպական միության անդամ չհանդիսացող):