Այս տարվա դեկտեմբերից պարտադիր կլինի եւս մեկ պատվաստում՝ պապիլոմա վիրուսի դեմ (փոխանցվում է սեռական ճանապարհով՝ առաջացնելով արգանդի վզիկի քաղցկեղ)։ Պապիլոմա վիրուսի դեմ պատվաստանյութը երաշխավորում է ՀՀ առողջապահության նախարարությունը։

Կառավարության երեկվա նիստից հետո նախարար Լեւոն Ալթունյանին ուղղված լրագրողների հարցադրումները մտահոգություն էին արտահայտում. երեխաներին առանց այդ էլ հիմա այնքան շատ են պատվաստում, այս հերթականն անհրաժեշտությո՞ւն էր, վտանգավոր չէ՞։
Նախարար Լեւոն Ալթունյանն առաջարկեց պատվաստանյութի հետ կապված բոլոր մտավախությունները մեկտեղել եւ ուղարկել նախարարության հասցեով. «Ձեզ խոսք եմ տալիս՝ բոլոր երկրների առողջապահության նախարարություններին կդիմենք եւ իրենց մասնագիտացած կարծիքը ձեզ կտրամադրենք։ Այսօր պապիլոմա վիրուսի դեմ պատվաստանյութը ոսկե ստանդարտ է՝ առաջակված Առողջապահության համաշխարհային կազմակերպության կողմից»։

Ի դեպ, դետեմբերից ներդրվող պատվաստումն ունենալու է պարտադիր բնույթ, բայց չցանկացողներն էլ կարող են գրավոր համաձայնությամբ հրաժարվել պատվաստումից։ Սակայն առողջապահության նախարարը կառավարության հերթական նիստից հետո հայտնեց իրենց դիրքորոշումը՝ պատվաստվել՝ առանց վարանելու։ «Որովհետեւ ցավալիորեն մեզ մոտ ուռուցքները հայտնաբերվում են 3—4—րդ փուլում, բուժման համար ծախսվում են մեծ միջոցներ, իսկ հիվանդը դրանից հետո ապրում է 2—3, մաքսիմում 5 տարի։ Պատվաստվելու դեպքում մենք կունենանք հիվանդություններից խուսափելու հնարավորություն շատ ավելի լավ էֆեկտով»։

Ինչպես տեղեկացրեց բանախոսը, պապիլոմա վիրուսի դեմ պատվաստանյութը ներդրվել է աշխարհի 70 երկրում։ Մինչեւ մեզ մոտ պատվաստումն առաջարկելը մասնագետներն ուսումնասիրել են հարցն ու նոր միայն պատվաստման եզրահանգել։

Արմենուհի ՄԵԼՔՈՆՅԱՆ