Հայաստանում կան դեղերի գների իջեցման նախանշաններ։ Երեկ այս մասին կառավարության նիստից հետո լրագրողների հետ զրույցում ասաց առողջապահության նախարար Լեւոն Ալթունյանը։

Նա վստահեցրեց, որ իրենք այդ ուղղությամբ քայլեր ձեռնարկում են՝ ըստ այդմ նախատեսելով, որ դեղերի գնանկում կարձանագրվի. «Մենք այդ ուղղությամբ աշխատում ենք։ Նախատեսում ենք, որ դեղերի գները կիջնեն։ Ձեռնարկել ենք կենտրոնացված գնումների նախագիծ, որի շնորհիվ պետական պատվերով ձեռք բերվող դեղերի՝ 20—23 տոկոս գների իջեցում կունենանք»։

«Շփոթմունք է եղել»,–ասաց Լեւոն Ալթունյանը՝ անդրադառնալով իր հայտարարությանը, թե Հայաստանում մինչեւ 15 տարեկան աղջիկների 25 տոկոսը սեռական կյանքի փորձ ունի։

«Հարցումների արդյունքները հրապարակված են, նախարարության լրատվական ծառայությունը պարզաբանում է տվել, խոսքը տարիներ առաջ կատարված հարցման մասին է, որը ցույց է տվել՝ 15 տարեկան հարցված տղաների 25 տոկոսը եւ աղջիկների 1 տոկոսը ներգրավված են այդ թվերի մեջ։ Ուղիղ եթերի ժամանակ շփոթմունք է եղել, «տղաների» տեղը հնչել է «աղջիկներ»,–ասաց Լեւոն Ալթունյանը։

Արմենուհի ՄԵԼՔՈՆՅԱՆ