Kinsa-ն առողջապահության ոլորտում գործունեություն ծավալող տեխնոլոգիական ընկերություն է, որի գլխավոր գրասենյակը գտնվում է ԱՄՆ Կալիֆորնիա նահանգի Սան Ֆրանցիսկո քաղաքում: Հիմնադրվել է 2012թ Ինդեր Սինգխի կողմից:

Kinsa խելացի ջերմաչափերի առաջին մոդելը շուկա է մուտք գործել դեռևս 2014թ: Խելացի ջերմաչափի սանդղակը լարով միանում է սմարթֆոնին և, ջերմության մասին տեղեկատվությանը զուգահեռ, էկրանին է փոխանցում տեղեկատվություն հնարավոր հիվանդության մասին: Ներդրված հատուկ ծրագիրը համակարգում է այդ տվյալները և օգտագործողին հնարավորություն տալիս անմիջապես տեսնելու գրանցված տվյալները:

2016թ-ից ընկերությունը թողարկում է երեխաների համար նախատեսված հատուկ ջերմաչափեր, որոնք խոսում են §Սեզամ փողոց¦-ի Էլմոյի ձայնով:

Ամերիկայի 500 հազար ընտանիքներ օգտագործում են Kinsa ջերմաչափեր: Հավաքված տվյալները Kinsa-ն վաճառում է բժշկական ոլորտում ձեռնարկատիրական գործունեություն ծավալող ընկերություններին, այդ թվում դեղատներին և դեղարտադրող ընկերություններին:

Այսպես, ձմեռային սեզոնին ընդառաջ, Kinsa-ն վիճակագրական տվյալների վաճառքի պայմանագիր է կնքել Clonox բժշկական կորպորացիայի հետ: Այդ ընկերությունն, իր հերթին, վերլուծելու է դրանք, որպեսզի մեծացնի իր կողմից իրականացվող գովազդի արդյունավետությունը: Այսպես, այն տարածաշրջաններում, որտեղ ջերմաչափերի սանդղակները հաճախակի են գրանցել բարձր ջերմություն, ստացվում է, որ ընկերությունն ավելի շատ կարող է գովազդել հարբուխի և մրսածության դեմ դեղամիջոցներ:

Clonox ընկերությունում նշել են, որ Kinsa-իտրամադրած վիճակագրական տվյալների ճշտությունը շատ ավելի բարձր է, քան այն տեղեկատվության, որը կարող է ստացվել սոցիալական կայքերում վերլուծության արդյունքում:

Kinsa-իհիմնադիր Ինդեր Սինգխը նշել է, որ իր ընկերության գործունեության գերնպատակը հասարակության առողջության բարձր մակարդակի պահպանումն է, այդ պատճառով տվյալները վաճառվում են միայն իրենց կողմից ստուգված գործընկերներին: Kinsa-ն ունի նաև ոչ ֆինանսական պայմանագիր, կնքված Teladoc-ի հետ, որին տվյալները փոխանցում է անվճար հիմունքներով:

Պայմանագրի համաձայն խելացի ջերմաչափերի օգտագործողները կարող են արտահանել գրանցված տվյալները Teladoc հավելված` բժշկի օպերատիվ խորհրդատվություն ստանալու համար:

«New York Times»-ը նշում է, որ Kinsa-ի գործունեությունը ուղղակիորեն չի խախտում գաղտնիության պահանջները, բայց բարձրացնում է անձնական տվյալների վերամշակման օրինական կարգավորման հարցը:
Պատրաստեց
Նարե Հարությունյանը