Ով նիհարելու ցանկություն ունի, պետք է ուշադրություն դարձնի ոչ միայն կերածին, այլև` թե երբ է ուտում…Ամերիկացի և իսպանացի գիտնականների խումբը գիտափորձ է անցկացրել 420 մարդու մասնակցությամբ, որի արդյունքում կարողացել է գտնել սննդի մարսման լավագույն ժամանակը:

Ինչպես հաղորդում է The Telegraph-ը, գիտնականները փորձարկվողներին բաժանել են երկու խմբի, մեկը ճաշել է մինչև ցերեկվա ժամը երեքը, մյուսը` դրանից հետո: Արդյունքում առաջին խմբի անդամները նիհարել են միջինը` 10 կգ-ով, երկրորդինը` 7.0 կգ-ով: Գիտափորձի հեղինակ դոկտոր Ֆրանկ Շիրը հայտարարել է, որ այդ հետազոտությունը ոլորտում ամենախոշորներից մեկն է եղել և ապացուցել է ուտելու ժամանակի ու նիհարելու միջև կապը:

……ԵՎ ԾԱՄԵՑԵՔ ԵՐԿԱՐ

Արագ նիհարման գաղտնիքը դրա մեջ են տեսնում բրիտանացի գիտնականները:

Մասնավորապես Բիրմինգհեմի համալսարանի մասնագետները հետազոտության շնորհիվ հաստատել են, որ ուտելիքը խնամքով ծամելով` մարդ կարող է ազատվել մարմնի քաշի ավելորդ կիլոգրամներից: Բանն այն է, որ յուրաքանչյուր պատառ առնվազն կես րոպե ծամելու դեպքում մեծանում է նիհարման հավանականությունը, և նրանք, ովքեր երկար են ծամում, ուտում են քիչ: Նրանց համար խնդիր չէ ընթրիքից հրաժարվելը…

Հետազոտության համար մասնակիցներին բաժանել են 3 խմբի, բոլորին տվել ապխտով ու պանրով բուտերբրոդներ: Առաջին խումբը դրանք կերել է ինչպես սովորաբար, երկրորդ խումբը`յուրաքանչյուր պատառը ծամելով 10 վայրկյան, երրորդ խումբը`30 վայրկյան: Արդյունքում երրորդ խումբը հրաժարվել է դեսերտից, որը բոլորին առաջարկվել էր բուտերբրոդներից հետո:

Հետազոտության հանրագումար արդյունքները պարզեցին, որ եթե մարդը կես րոպեից ոչ քիչ ծամի ուտելիքը, ապա կկորցնի երեկոյան ինչ-որ բան ուտելու ցանկությունը: Այդտեղ չկա ուրիշ գաղտնիք`քան այն, որ օրվա ընթացքում կուտակված կալորիաների ընդհանուր թիվը զգալիորեն նվազում է, ինչն էլ թույլ է տալիս հեշտացնել նիհարման գործընթացը:

Բացի դրանից, երկար ծամելը ոչնչացնում է սննդի համային հատկանիշները, դրա համար էլ նման միջոցը "հաղթահարում են" միայն ամենանպատակասլաց անձինք: