Քնելու դիրքից շատ բան է կախված: Մշտապես սխալ դիրքով քնելը կարող է պատճառ դառնալ որոշակի հիվանդությունների ձեռք բերման կամ էլ` եղածի խորացմանը:
Ստորև ներկայացվող նյութը ձեզ կօգնի կողմնորոշվել ինչպես քնել:

Թիկունքի վրա

Թիկունքի վրա քնելն ամենալավ դիրքն է նրանց համար, ովքեր ցանկանում են լավ տեսք ունենալ, դիմային մկաներն այդ դիրքում թուլանում են, մաշկին ապահովելով թթվածնի բավարար մատակարարում: Արդյունքում` թարմ տեսք ու կնճիռների ավելի ուշ դրսևորում: Ողնաշարի վրա ծանրաբեռնվածությունն ամենանվազագույնն է, որը թույլ է տալիս լիովին հանգստանալ` դրա հետ մեկտեղ թուլացնելով միջողնային սկավառակները, ինչն էլ իր հերթին լավ է օստեոխոնդրոզի կանխարգելման համար: Այս դիրքը հարմար չէ նրանց, ովքեր խռմփացնում են, նաև տառապում գիշերային ապնոէից (շնչադադար) կամ բրուկսիզմից (ատամների կրճտոց):

Կողքի վրա

Կողքի վրա քնելուց նվազում է ծանրաբեռնվածությունը գոտկատեղի վրա, այնպես, որ այդպիսի ցավերի դեպքում դա ամենալավ դիրքն է: Վերին շնչուղիները չեն միակցվում, նշանակում է մարդը չի խռմփացնում, օրգանիզմն էլ թթվածնով բավականաչափ լավ է մատակարարվում: Այս ամենը լավացնում է քնի որակը` թույլ տալով առավելագույնս հանգստանալ: Այս դիրքը նաև նվազեցնում է սրտային հիվանդությունների ռիսկը և նպաստում գլխուղեղի լավ աշխատանքին:

Որովայնի վրա

Որովայնի վրա քնելը կթեթևացնի վիճակը` եթե տառապում եք որովայնի փքվածությամբ, այդ պատճառով էլ երբեմն փոքր երեխաներին պառկեցնում են այդ դիրքով: Սակայն ողնաշարի պարանոցային հատվածը գտնվում է անբնական դիրքում, ինչն էլ կարող է հանգեցնել ցավերի, նաև վատացնել գլխուղեղի արյան մատակարարումը, որովհետև ողնաշարի զարկերակներից մեկը երբեմն մասնակի փակվում է: Դեմքի մաշկին թթվածնի մատակարարումը նույնպես նվազագունն է, դրա համար էլ ովքեր սիրում են այս դիրքով քնել, նրանց մոտ ժամանակից շուտ են կնճիռներ դրսևորվում:

Կարևոր է, որ հարմար դիրքով քնելուց բացի` անպայման ուշադրություն դարձնեք ներքնակին: Եթե պառկում եք անհարմար ներքնակի վրա, ապա ստիպված եք լինում հաճախակի փոխել դիրքը, իսկ դա անքնության ամենագլխավոր պատճառներից մեկն է….
Ամենահարմարը կիսակոշտ ներքնակն է: