Կրծքագեղձի քաղցկեղի վիրահատության նոր տեսակը հնարավորություն է տալիս ուռուցքը հեռացնելուց հետո պահպանել կրծքի էսթետիկ տեսքը: Այս մասին այսօր լրագրողների հետ հանդիպման ժամանակ հայտնեց «Հայ Ամերիկյան Առողջության Կենտրոնի» վիրահատական բաժանմունքի ղեկավար, վիրաբույժ-ուռուցքաբան Արմեն Քոչարյանը:

Նոր մեթոդներով վիրահատություն անցկացնելու համար ԱՄՆ-ից Հայաստան է ժամանել պլաստիկ վիրաբույժ, պրոֆեսոր Արթուր Սալիբյանը:

«Այստեղ կարևորը ուռուցքաբանի և վիրաբույժի համատեղ աշխատանքն է: Վիրահատությունը բաղկացած է երկու մասից, սկզբում ընթանում է բուն վիրահատությունը, հեռացվում է ուռուցքը, այնուհետև սկսվում է պլաստիկ վիրաբույժի աշխատանքը և տեղադրվում է իմպլանտը, որի շնորհիվ էլ պահպանվում է արտաքին տեսքը, ինչն էլ կնոջ վրա հոգեբանորեն դրական ազդեցություն է ունենում»,-ասաց Սալիբյանը:

Նա նաև հայտնեց, որ Եվրոպայում գրեթե 20 տարի է, ինչ կիրառվում է այս մեթոդը, իսկ ԱՄՆ-ում` 10 տարի: Արմեն Քոչարյանը տեղեկացրեց, որ Արթուր Սալիբյանի գլխավորությամբ իրենք արդեն հաջողությամբ կատարել են նման վիրահատություն:

«Մոտ մեկ շաբաթ առաջ մեր կենտրոնում կատարվել է նման վիրահատություն: Հիվանդը գտնվում է մեր հսկողության տակ, ամեն ինչ նորմալ է ընթանում»,- նշեց Արմեն Քոչարյանը` ավելացնելով, որ վիրահատությունը կատարել է բարեգործական հիմունքներով:

Իսկ թե ինչ արժեք կունենա նման վիրահատությունը մեր երկրում նա պատասխանեց. «Դժվար է ասել, թե ինչ կարժենա նման վիրահատությունը: Արթուր Սալիբյանն ինքն է բերել անհրաժեշտ պրոթեզները և վիրահատության մնացած ծախսերն էլ է հոգացել: Այս դեպքում անհրաժեշտ է տալ վիրահատության և պրոթեզի գումարը, որը մեր երկրի վիճակից ելնելով` կլինի հասարակությանը մատչելի»: