«Նախորդ տարի, ի տարբերություն մյուս ոլորտների, դեղագործական ոլորտը բավականին աճ է ապրել: Տեղական արտադրանքը 26 տոկոսով ավելացել է»,- լրագրողների հետ զրույցում ասաց ՀՀ դեղարտադրողների և ներմուծողների միության տնօրեն Սամվել Զաքարյանը:

Նրա խոսքով, 2013 թ. Հայաստանում առաջին անգամ պատշաճ արտադրության գործունեության հավաստագիր է տրվել դեղագործական մի կազմակերպության, շուտով նման հավաստագիր տրվելու է նաև երկրորդ կազմակերպությանը, մինչև տարեվերջ պատշաճ արտադրության գործունեության ևս երկու հավաստագիր կտրվի:

«Սա հնարավորություն կտա այդ կազմակերպություններին, ավելացնել թե իրենց արտադրության, թե արտահանման ծավալները»,- ասաց Ս. Զաքարյանը:

Նշենք, որ այսօր ՀՀ առողջապահության նախարարությունը և Հայաստանի դեղ արտադրողների և ներմուծողների միությունը, ՀՀ կառավարության ծրագրի շրջանակներում կազմակերպել էին «Դեղերի շրջանառության ոլորտի բարեփոխումները» թեմայով քննարկում:

Ս. Զաքարյանն ասաց, որ այսօրվա քննարկման հիմնական նպատակն է, որպեսզի ներկայացվի, քննարկվի ազգային դեղագործական քաղաքականության կանոնները, ինչ ծրագրով պետք է աշխատի մասնավոր հատվածը և կառավարությունը դեղերի ոլորտում:

Panorama.am