Թեև աղիքային հիվանդություններն իրենց պիկին են հասնում հատկապես ամռանը, սակայն համաճարակային վիճակը հանրապետությունում համեմատաբար հանգիստ է: Այս մասին այսօր լրագրողների հետ հանդիպման ժամանակ ասաց ՀՀ առողջապահության նախարարության հիվանդությունների վերահսկման և կանխարգելման ազգային կենտրոնի ներկայացուցիչ Լիանա Թորոսյանը:

Սակայն, ըստ նրա, միայն էնտերովիրուսային համաճարակների աշխուժացում է նկատվում: Ընդհանուր առմամբ` հանրապետությունում գրանցվել է էնտերովիրուսային վարակների 50 դեպք, մասնավորապես, 2-8 տարեկան երեխաների շրջանում:

«Թեև էնտերովիրուսային վարակների որոշակի ակտիվություն է նկատվում, սակայն ամեն ինչ գտնվում է նախարարության վերահսկողության տակ և ահազանգերի կարիք չկա»,- նշեց Լ.Թորոսյանը:

Ինչ վերաբերում է աղիքային հիվանդություններին, նա ասաց, որ աղիքային վարակիչ հիվանդությունները իրենց բնորոշ սեզոնայնությունն ունեն, մասնավորապես, ամռանը վարակի տարածման համար կան բոլոր բարենպաստ պայմանները: Այսպիսով՝ տարածման աղբյուր կարող է հանդիսանալ ջուրը, չլվացած կամ վատ լվացած բանջարեղենն ու միրգը, պատահական վայրերից գնված կաթնամթերքն ու այլ սննդամթերքը:

Վարակներից խուսափելու համար Լ. Թորոսյանը խորհուրդ տվեց առաջին հերթին պահպանել անձնական հիգիենան. «Ձեռքերը պետք է կանոնավոր կերպով լվանալ, քանի որ յուրաքանչյուր վարակիչ հիվանդության և, հատկապես, աղիքային հիվանդությունների տարածման հիմքում ընկած է անհատական հիգիենան»:

Նա միաժամանակ նշեց, որ բանջարեղենն ու միրգը ուտելուց առաջ հոսող ջրի տակ պետք է մանրակրկիտ լվանալ, բացի այդ, պետք է խուսափել արագ պատրաստվող սննդից:

Պետք է խուսափել հատկապես կրեմային սննդամթերքից, քանի որ ոչ պատշաճ սառնարանային պայմաններում պահպանված սննդամթերքը կարող է տարբեր սննդային գործոններով պայմանավորված հիվանդությունների պատճառ հանդիսանալ։ Իսկ կրեմային հրուշակեղենի մեջ բոլոր նախապայմանները կան:

«Երկու ժամ առանց սառնարանային պայմանների մնալու դեպքում սննդամթերքի մեջ աղիքային հիվանդությունների հարուցիչներ կարող են զարգանալ»,- ասաց Լ.Թորոսյանը:

Ծնողներին էլ խորհուրդ տվեց իրենց երեխաներին թույլ չտալ լողանալ դրսի լողավազաններում, քանի որ շատ հաճախ թափառող կենդանիները նույնպես փորձում են այդ լողավազաններում հովանալ, ինչի արդյունքում էլ աղտոտվում է ջուրը:

Անտառային հանգստի մեկնողներին էլ խորհուրդ տրվեց հագնվել երկարաթև, բամբակե, բաց գույնի զգեստ, որպեսզի խուսափեն կրծողների և միջատների խայթոցներից:

Լ. Թորոսյանը նաև կոչ արեց այս սեզոնին շատ հեղուկ օգտագործել, սակայն չխմել սառույցով ջուր, քանի որ այն ծարավը չի հագեցնում: Դրա փոխարեն, ըստ նրա, կարելի է խմել գոլ ջուր կամ թեյ, օգտակար է նաև թանը:

Աղբյուր` Panorama.am