«Հայաստանի Հանրապետությունում դեղերի, բուժտեխնիկայի և բուժական մեթոդների գովազդին ներկայացվող պահանջները» գրքույկի շնորհանդեսի ժամանակ առողջապահության նախարարության պատասխանատուները պարզաբանեցին Հայաստանի Հանրապետությունում դեղերի, բուժտեխնիկայի և բուժական մեթոդների գովազդին առնչվող հարցերը, մեկնաբանեցին նախարարության կողմից մատուցվող ծառայությունների քաղաքականությունը, ոլորտում իրականացվող բարեփոխումները։

ՀՀ առողջապահության նախարարության աշխատակազմի լիցենզավորման գործակալության պետ Արմեն Սողոյանը ներկայացրեց Հայաստանի Հանրապետությունում դեղամիջոցների, բուժտեխնիկայի և բուժական մեթոդների գովազդի թույլտվության տրամադրման կարգն և գովազդին ներկայացվող պահանջները։ Մասնավորապես նա նշեց, որ ներկայացվող գրքույկը հասարակության և շահառուների իրազեկվածության բարձրացմանն ուղղված քայլերից է և անվճար տրամադրվելու է շահագրգիռ անձանց և կազմակերպություններին` գովազդով զբաղվող քաղաքացիներին և իրավաբանական անձանց:

Նշենք, որ ծառայությունների մատուցման ոլորտում պետական քաղաքականությունն ուղղված է թույլտվությունների տրամադրման գործընթացի պարզեցմանը՝ միևնույն ժամանակ ապահովելով պետության և կազմակերպությունների կողմից մատուցվող ծառայությունների որակի բարելավումը: Հայաստանում դեղերի, բուժտեխնիկայի և բուժական մեթոդների գովազդը կարգավորվում է «Գովազդի մասին» ՀՀ օրենքով, ՀՀ կառավարության 2006թ. նոյեմբերի 2-ի N1608-Ն որոշմամբ, որոնցով սահմանված են դեղերի, բուժտեխնիկայի և բուժական մեթոդների գովազդի թույլտվության տրամադրման կարգը և դեղերի, բուժտեխնիկայի և բուժական մեթոդների գովազդին ներկայացվող պահանջները: Այս նորմատիվ ակտերով սահմանված են գովազդատուի և լիազոր մարմնի միջև իրավահարաբերությունները:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, Հայաստանում դեղերի, բուժտեխնիկայի և բուժական մեթոդների գովազդ իրականացնելու համար շահագրգիռ անձինք պետք է գործեն ըստ հատուկ սահմանված ընթացակարգի։ Շահագրգիռ կողմերին իրազեկելու, նրանց մատուցվող ծառայությունների որակը բարելավելու, գովազդի լիցենզավորման գործընթացն առավել թափանցիկ դարձնելու, դեղամիջոցների շուկայի գովազդի ոլորտը կարգավորելու նպատակով էլ ԱՄՆ ՄԶԳ Հայաստանի առողջապահության համակարգի հզորացում (HS-STAR) ծրագրի օժանդակությամբ ՀՀ առողջապահության նախարարությունը մշակեց և տպագրեց ներկայացվող ուղեցույցը: Այն հայտատուների համար դյուրին է դարձնում գովազդի հայտի ներկայացման հետ կապված հարցերը, ծանոթացնում վերը նշված իրավական ակտերին և դրանց կարևոր դրույթներին՝ հնարավորություն ընձեռելով գովազդի հայտերը ներկայացնել նշված պահանջներին համապատասխան։