Վերջին օրերին Երեւանում լուրեր են շրջանառվում, թե հունվարի 1-ից դեղորայքն այլեւս հաբերով չի վաճառվելու եւ հաճախորդները ստիպված են լինելու գնել ամբողջ տուփը:

Մեդիամաքսին այս մասին հայտնեցին նաեւ Երեւանի Կենտրոն համայնքում գործող մի շարք դեղատներից: Վերջիններիս աշխատակիցների խոսքով՝ «իրենց արդեն հայտնել են` դեղորայքի վաճառքի համակարգը շուտով փոխվելու է»:

Առողջապահության նախարարի՝ դեղորայքային քաղաքականության հարցերով խորհրդական Ղուկաս Ուլիխանյանը Մեդիամաքսի հետ զրույցում նշեց, որ շրջանառվող լուրը «որեւէ հիմք չունի»:

«Կառավարությունը քննարկում է «Դեղերի մասին» նոր օրենքը: Դեռ ոչինչ որոշված ու հաստատված չէ, դեղահաբերի վաճառքի վերաբերյալ կառավարության կամ նախարարի կողմից որեւէ հրաման չկա, ուստի` վաճառքի կարգը կմնա անփոփոխ: Անհանգստության որեւէ պատճառ չկա»,- ասաց առողջապահության նախարարի խորհրդականը:

mediamax.am