Եվրասիական տնտեսական միությանը Հայաստանի անդամակցության հետ կապված՝ շարունակվելու են անդամ երկրների դեղերի ոլորտի կարգավորման ներդաշնակեցման խնդրի շուրջ բանակցությունները, ինչը նախատեսված է իրականացնել մինչեւ 2016 թվականի հունվարի 1—ը։ Այս մասին երեկվա ասուլիսում հայտնեց Հայաստանի դեղ արտադրողների եւ ներմուծողների միության (ԴԱՆ միություն) գործադիր տնօրեն Սամվել Զաքարյանը։

«Հայաստանում, ի տարբերություն ԵՏՄ անդամ մյուս երկրների՝ Ռուսաստանի, Ղազախստանի եւ Բելառուսի, ոլորտն ավելի լավ է կարգավորվում, քանի որ ՀՀ—ում ներդվել է ըստ Եվրամիության պատշաճ արտադրական գործունեության (EU Good Manufacturing Practice—GMP) կարգավորումը, եւ երկու հայրենական ընկերություններ հավաստագրել են իրենց համապատասխանությունը EU GMP ստանդարտներին։ Մինչդեռ ԵՏՄ մյուս երկրներում դեղերի ոլորտը կարգավորվում է ԳՕՍՏ—երով, որոնք միջազգայնորեն ճանաչված չեն։ Նախատեսվում է, որ ստեղծվելու է ԵՏՄ—ի դեղերի ոլորտի կարգավորման գործակալություն, որը կհավաստագրի ԵՏՄ չորս երկրների դեղագործական ընկերությունների համապատասխանությունը GMP ստանդարտներին»,– «Արմենպրեսի» հաղորդմամբ՝ նշեց նա։

Զաքարյանի խոսքով՝ ԵՏՄ անդամ չորս երկրների համապատասխան հանձնաժողովները բանակցում են ԵՏՄ տարածքում դեղերի ոլորտի կարգավորման հարցում ընդհանուր հայտարարի գալու շուրջ, եւ ՀՀ—ում ցանկանում են, որ պահպանվի ըստ EU GMP ստանդարտների կարգավորումը, քանի որ այդպիսով ստեղծվում է արտահանման ծավալները եւ ուղղություններն ընդլայնելու հնարավորություն. ներկայում արտահանվում է հայրենական դեղարտադրության ծավալի 50 տոկոսից ավելին։

«Այդ հանձնաժողովների բանակցությունների արդյունքում արդեն իսկ հայկական կողմին հաջողվել է պահպանել Հայաստանում գործող՝ ԵՏՄ մյուս երկրների համեմատ մաքսային ցածր դրույքաչափերը, սակայն դեղագործական որոշ հումքատեսակների մասով արձանագրվել է բացթողում՝ կապված տարբեր երկրների արտաքին տնտեսական գործունեության ապրանքային անվանացանկերում (ԱՏԳ ԱԱ) հումքատեսակների տարբեր անվանումների հետ, եւ Հայաստանի պարագայում դրանց դրույքաչափերը բարձրացվել են, թեեւ հույս կա, որ հետագա բանակցությունների արդյունքում դրանց ներմուծման մաքսային դրույքաչափերը կնվազեն։ Խնդիրը կարեւորվում է այն առումով, որ հայկական դեղագործական ընկերությունների օգտագործած որեւէ դեղահումք ԵՏՄ անդամ մյուս երեք երկրներում չի արտադրվում»,–ընդգծեց ԴԱՆ միության տնօրենը։

Նա պարզաբանեց, որ խնդիրներ կան նաեւ դեղերի գրանցման հետ կապված, քանի որ ԵՏՄ մի երկրում որոշակի դեղագործական արտադրանքը կարող է դիտարկվել որպես դեղ, իսկ մյուսում՝ որպես սննդային հավելում։ Բացի այդ, կարգավորման է ենթակա ԵՏՄ մի երկրում գրանցված դեղը մյուս երկրում ավտոմատ գրանցելու հարցը։

Զաքարյանի հավաստմամբ՝ հայրենական դեղ արտադրողները խնդիրներ չեն ունեցել ՌԴ դեղամիջոցներ արտահանելիս։ ԴԱՆ միության ղեկավարը, միաժամանակ, մարտահրավեր համարեց այն հանգամանքը, որ արտերկրի, մասնավորապես, ԵՏՄ մյուս երկրների արտադրողների համար շատ հեշտ է գրավել Հայաստանի դեղերի փոքր շուկան։