ՀՀ առողջապահության նախարար Արմեն Մուրադյանը երեկ լրագրողների հետ զրույցում հույս է հայտնել, որ այս տարի երկրորդ ընթերցմամբ կընդունվի «Դեղերի մասին» օրենքը, որն ընդգրկում է ամբողջ շղթան՝ դեղերի ստեղծումից մինչեւ հիվանդին, շահառուին հասնելը եւ կիրառման ձեւը։

«Կարծում եմ, որ դեղերի հետ կապված բոլոր հարցերի պատասխանները համապարփակ կարտացոլվեն նոր օրենքով»,–նշել է նախարարը։
Ինչ վերաբերում է կեղծ դեղերի առումով քրեական պատասխանատվության ենթարկելուն, Արմեն Մուրադյանն ասել է, որ նման մոտեցումներ կան տարբեր երկրներում եւ Հայաստանում նույնպես դա քննարկվելու է։
«Վարչական տարբեր լծակներ կան, որոնք առայժմ չեն կիրառվել եւ նոր օրենքով բավականին խստացվելու են ե՛ւ դեղերի հաշվառումը, ե՛ւ տրամադրումը, ե՛ւ դուրսգրումը։ Այս բոլոր օղակները այդ մեծ շղթայում պետք է ունենան վարչական լուրջ վերահսկողություն, եւ կարծում եմ, որ խնդիրների մեծամասնությունը հնարավոր կլինի լուծել նոր օրենքի շրջանակներում»,–նշել է Արմեն Մուրադյանը։

Նախարարը, պատասխանելով հարցին, թե կառավարությունում առողջապահության նախարարության աշխատանքների վերաբերյալ հաշվետվության ժամանակ վարչապետը դժգոհել է, որ պետպատվերով բուժօգնության հետ կապված բողոքները շատացել են, ասել է. «2014 թվականին առողջապահության համակարգում 400 հազար դեպքից 329 հազարը ֆինանսավորել է պետությունը, 2015թ. 326 հազար դեպք եւս ֆինանսավորել է պետությունը։

Այսինքն՝ այս մեծ բեռն իր վրա է վերցրել պետությունը եւ այդ աշխատանքների ընթացքում կարող են լինել նաեւ որոշակի խնդիրներ»։
Անդրադառնալով պետական պատվերով բուժօգնությանը, նախարարը նշել է. խնդիրները, որոնք կան տարիների ընթացքում կուտակված, առկա են, եւ հիմա փորձում են այդ խնդիրները նախ՝ վերլուծել ըստ կարիքների եւ խմբավորել, իսկ դրանից հետո փորձել դրանց հետ կապված ֆինանսական մեխանիզմներ մշակել։
«Իհարկե, յուրաքանչյուր երկրում՝ անկախ ֆինանսական մեխանիզմներից, առողջապահական ոլորտում միշտ լինում են սոցիալական լարվածություն, դժգոհություններ»,–նկատել է նա։

Նախարարի խոսքերով, քննարկվում են օպտիմալացման խնդիրները՝ ինստիտուցիոնալ սկզբունքների հիման վրա, մասնավորապես՝ առողջապահության մոտակա տարիների ընդհանուր ռազմավարության զարգացման հարցերը եւ ըստ կարիքների գնահատման, որն այս տարի համարել են որպես գերակա խնդիր. «Ըստ դրա կլինեն համապատասխան առաջարկներ, թե ինչպիսի կառույցներ, ինչ կազմով պետք է իրականացնեն»։

Արմեն Մուրադյանն անդրադարձել է նաեւ «Զիկա» վիրուսի տարածմանը. «Այն փոխանցվում է մոծակների միջոցով, որոնց առկայությունը Հայաստանում չկա՝ ելնելով բնակլիմայական պայմաններից»։ Նա նշել է, որ Հայաստանում «զիկա» վիրուսով վարակվելու ոչ մի դեպք չի գրանցվել. «Կարող են վարակվել միայն այն երկրներում, որտեղ այդ մոծակները կան»։