Դեկտեմբերի 4-ին ՀՀ սփյուռքի նախարարության նախաձեռնությամբ, Զարգացման հայկական գործակալության և Փոքր և միջին ձեռնարկությունների զարգացման կենտրոնի աջակցությամբ տեղի ունեցավ հանդիպում-խորհրդակցություն, որին մասնակցում էին Հայաստանում ներդրումներ անելու ցանկություն ունեցող, հատկապես դեղագործության ոլորտով հետաքրքրված շուրջ 10 սիրիահայ գործարար:

Հայաստանում դեղարտադրություն հիմնել ցանկացող սիրիահայերին Հայաստանի Դեղ արտադրողների և ներմուծողների միության տնօրեն Սամվել Զաքարյանը խորհուրդ տվեց ճիշտ գործընկերներ որոնել, դրամ չխնայել և աշխատանքի ընդունել որակյալ մասնագետներ: Նա նշեց, որ բարեխղճորեն հարկեր վճարելու և հայաստանյան օրենքներին ենթարկվելու պարագայում հնարավոր է արդյունավետ բիզնես ունենալ: Ս. Զաքարյանը հորդորեց չհավատալ Հայաստանում բիզնեսի վերաբերյալ սփյուռքում տարածված մտացածին պատմություններին:
ՀՀ առողջապահության նախարարության Դեղերի և բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը ողջունեց Հայաստանում դեղագործությամբ զբաղվելու սիրիահայերի ցանկությունը, ընդգծեց, որ Սիրիայում դեղագործությունը կազմակերպվում է Եվրամիության Պատշաճ արտադրական գործունեության չափանիշներին համապատասխան, ուստի սիրիահայերն արդեն նշված ոլորտում կուտակված փորձ ունեն: Հ. Թոփչյանը հիշեցրեց, որ դեղագործությունը ՀՀ կառավարության կողմից ընդունված գերակա ուղղություններից մեկն է, ուստի բազմաթիվ են ոլորտը խթանելու օրենսդրական բարեփոխումները: Պետությունը խրախուսում է Հայաստանում ներդրումային քաղաքականությունը, 300 մլն դրամի ներդրումներ կատարելու դեպքում հետաձգվում է ԱԱՀ-ի վճարումը: Դեղագործության ոլորտի զարգացմանն է ուղղված նաև ազատ տնտեսական գոտիներից օգտվելու հնարավորությունը. արտադրության հիմնումը, առանց հարկային պարտավորությունների ներմուծման և արտահանման կազմակերպումը:

Հանդիպմանը ներկա էին նաև որոշ դեղագործական և կոսմետիկա արտադրող ընկերությունների ղեկավարներ, ովքեր պատմեցին իրենց փորձի և իրենց ընկերությունների հաջողության մասին:

Ոլորտի պատասխանատուները սիրիահայ գործարարներին խորհուրդ տվեցին Հայաստանում հիմնել բալքերի / պատրաստի դեղերի/ փաթեթավորման արտադրություն, ապա զարգացնել այն:

Սիրիահայերը հետաքրքրված էին, թե արդյոք նոր գործարանի հիմնումը լարված մրցակցություն չի ստեղծի հայկական դեղագործական շուկայում, սակայն հայրենական դեղարդյունաբերության պատասխանատուները վստահեցրին, որ հայկական դեղաշուկան բավական դեմոկրատական է, և գործող ընկերություններն աշխատում չկրկնել մեկը մյուսի արտադրանքը, շուկա մտցնել նոր արտադրատեսակներ:

Սիրիահայերից ոմանք ցանկություն հայտնեցին Հայաստան ներմուծել բրենդային դեղամիջոցներ, ՀՀ ԱՆ ԴԲՏՓԿ տնօրենը Հայաստանում դեղերի գրանցման, ներմուծման և հետգրանցումային վերահսկողության վերաբերյալ անհրաժեշտ պարզաբանումներ տվեց:

Հանդիպման ավարտին ներկաները որոշեցին այցելել հայկական դեղարդյունաբերության գործող ընկերություններ, տեղում ծանոթանալ գործընթացներին, նոր հարցադրումների դեպքում դիմել պատասխանատուներին:
ՀՀ սփյուռքի նախարար Հրանուշ Հակոբյանը շնորհակալություն հայտնեց հանդիպման ներկաներին, հատկապես ոլորտի պատասխանատուներին՝ հորդորելով աջակցել Հայաստանում գտնվող սիրիահայերին` կայանալու և իրենց փորձն ու հմտությունները հայկական իրականություն բերելու գործում: