Դեղերի նկարագրություն
Ինչպես ճիշտ պաշտպանվել արեւի ճառագայթներից
Ամռան կիզիչ արեւն ու շոգը, բնականաբար, իրենց անդրադարձն են ունենում թե՛ մաշկաբանական խնդիրների, թե՛ սրտաբանական հիվանդությունների սրացման վրա, եւ որպեսզի մարդիկ կարողանան առողջ պահել իրենց մաշկը, պետք է հետեւեն մասնագետների խորհուրդներին։Մաշկաբան Հովհաննես Հովհաննեսյանը երեկ լրագրողների հետ հանդիպմանը նշեց, որ հատկապես ամռանը մաշկը առավել խնամք է պահանջում։ Նա որպես առաջնահերթություն ընդգծեց մաշկի մեջ ջրի պարունակության առկայությունը։ Ըստ նրա, չպետք է թույլ տալ, որ ջուրը մաշկից գոլորշիանա, այդ նպատակով անհրաժեշտ է օգտագործել հատուկ խնամքի համար նախատեսված խոնավացնող քսուքներ։
«Մեր երկրի ուժեղ ճառագայթման պայմաններում մաշկը պահանջում է յուրահատուկ խնամք եւ պաշտպանություն արեւից, ինչի մշակույթը մենք չունենք եւ արեւապաշտպանիչ քսուքներ ենք օգտագործում միայն հանգստի մեկնելու նպատակով, մինչդեռ արեւի ճառագայթների վտանգավորությունն առկա է նաեւ Երեւանում, նույնիսկ՝ վաղ առավոտից, երբ աշխատանքի ենք շտապում»,–նշեց մաշկաբանը։ Այս պարագայում եւս մասնագետը խորհուրդ է տալիս օգտագործել արեւապաշտպանիչ քսուքներ, որոնց ընտրությունը, սակայն, բարդ խնդիր է՝ կախված շուկայում առկա տարատեսակ քսուքների առատությունից։
Երկրից հանգստի մեկնողներին մաշկաբանը խորհուրդ է տալիս նախապես խորհրդակցել բժշկի հետ, տեղեկանալով՝ ինչ խնամք է հարկավոր տվյալ երկրին բնորոշ կլիմայական փոփոխության պարագայում։ «Այս դեպքում ուշադիր պետք է լինել ոչ միայն մաշկի, այլեւ սիրտ–անոթային, աղեստամոքսային տրակտի նկատմամբ, հետեւել բժշկի խորհուրդներին՝ ինչպես սնվել, որքան հեղուկ օգտագործել եւ այլն»,—հորդորում է Հովհանես Հովհաննիսյանը։ Արեւի հանդեպ գերզգայունություն ունեցող մարդկանց բանախոսն առաջարկում է խորհրդակցել մասնագետի հետ՝ ճշտելու ալերգիկ երեւույթի պատճառը։ Գերզգայունություն կարող է առաջացնել նաեւ որոշ դեղամիջոցների օգտագործումը։ Մաշկաբանը խոսեց մի խնդրի մասին եւս։ Նա մատնանշեց, որ շատերը նույնիսկ արեւապաշտպանիչ քսուքներից չգիտեն ինչպես օգտվել եւ գանգատվում են, թե ինչո՞ւ այն արդյունավետ չի ներազդում։ Պատճառն, ըստ մասնագետի, այն է, որ քսուքը պետք է մաշկի մեջ ներծծվի, որպեսզի կորցնի գերզգայությունն արեւի հանդեպ։ Ուստի քսուքը քսելուց հետո պետք է շուրջ 40—50 րոպե սպասել, որպեսզի արդյունավետ ներգործի։
Թույլ այրվածքի դեպքում մաշկաբանը խորհուրդ է տալիս սովորական սառը թրջոցներ օգտագործել, իսկ առավել խոր այրվածքի դեպքում՝ անհապաղ դիմել բժշկի։
Սրտաբան Գոհար Մարտիրոսյանն էլ անդրադարձավ սիրտ–անոթային հիվանդների ճիշտ խնամքին։ Ամառը բնորոշվում է շոգ եղանակով, եւ մարդու օրգանիզմում նյութափոխանակությունը 20—30 տոկոսով ավելանում է, ինչը հանգեցնում է սրտի նկատմամբ ծանրաբեռնվածության մեծացման։ Մարդիկ քրտնքի միջոցով հեղուկի մեծ քանակ են կորցնում, ինչն էլ նպաստում է արյան խտացման, մածուցիկության բարձրացման եւ տրոմբագոյացման մեծացման երեւույթին։ Ուստի ամռանն անհրաժեշտ է մեծացնել ջրի քանակն օրգանիզմում եւ շատ հեղուկ օգտագործել։ Սրտաբանը խորհուրդ է տալիս բացի հեղուկից մեծ ուշադրություն դարձնել նաեւ սննդին եւ խուսափել ճարպոտ կերակրից, նախապատվությունը տալ մրգերին եւ բանջարեղենին, որոնք հարուստ են սիրտն առողջ պահելու համար անհրաժեշտ վիտամիններով։ Իսկ սրտի անբավարարություն ունեցող մարդկանց մասնագետը հորդորում է հետեւել բուժման կուրսին ու անհրաժեշտ ցուցումներին։
«Շատ դեպքեր են լինում, երբ հիվանդները ինքնուրույն, առանց բժշկի հետ խորհրդակցելու եւ հետազոտվելու կատարում են բուժման ընդհատում եւ դոզաչափի փոփոխություն։ Սրտային հիվանդները պետք է իմանան, որ բուժումից դեղը կտրուկ հանելով՝ կարող են ավելի մեծ վնաս հասցնել առողջությանը, քան բուժումը շարունակելով։ Այն հիվանդներին, ովքեր ինֆարկտ են ունեցել մի քանի ամիս առաջ, արգելվում է տեղափոխվել այլ երկիր՝ ելնելով կլիմայական փոփոխությունից։ Բոլոր մեկնողները պետք է իրենց հետ ունենան դեղորայքի պաշար եւ առաջին երկու օրերին նախընտրեն առավել պասիվ հանգիստը, մինչեւ օրգանիզմի տվյալ կլիմայական փոփոխությանը հարմարվելը։ Բացի այդ, շատ քնեն եւ չափավոր սնվեն, առանց հագեցման»,–ասաց Գոհար Մարտիրոսյանը։
Լուսինե ՆԱԶԱՐՅԱՆ
