ՀՀ առողջապահության նախարար Դերենիկ Դումանյանը երեկ 2012 թվականի ամփոփիչ ասուլիսի ժամանակ նշեց, որ տարվա ընթացքում դեղերի ոլորտում առկա լուրջ խնդիրների կանոնակարգման համար քննարկումներ են եղել, որի արդյունքում նախարարության կողմից մշակվել եւ շրջանառության մեջ է դրվել «Դեղերի մասին» ՀՀ օրենքի նոր նախագիծը։ Վերջինով սահմանված են դեղերի շրջանառության ոլորտում պետական քաղաքականության հիմնական դրույթները, այն է՝ բնակչությանը մատչելի, որակյալ, արդյունավետ եւ անվտանգ դեղերով ապահովումը, դեղերի տնտեսական եւ ֆիզիկական մատչելիությունը, դեղերի տեղական արտադրության խթանումը, ինչպես նաեւ սոցիալական արդարության սկզբունքի ամրագրման երաշխիքների ստեղծումը։

Առողջապահության ոլորտում պետական վերահսկողություն իրականացնելու նպատակով ՀՀ ԱՆ հիգիենիկ եւ հակահամաճարակային տեսչության բազայի վրա կստեղծվի առողջապահական տեսչություն՝ նույն հաստիքներով։ Տեսչական գործառույթների մեջ կընդգրկվի դեղերի, բժշկական օգնության եւ սպասարկման որակի եւ անվտանգության, առողջապահական գովազդի, բուժօգնության պետական պատվերի ծավալների, ֆինանսավորման եւ նպատակային ծրագրերի կատարման արդյունավետության, դեղերի գների նկատմամբ վերահսկողության, մշտադիտարկման եւ վերլուծության իրականացումը։