Դեղերի նկարագրություն
Բոլիվիացի դատավորը նախքան բարդ որոշում կայացնելը խորհուրդ է հարցնում կոկայի տերեւներից
Բոլիվիացի դատավորը խոստովանել է, որ նախքան բարդ որոշում կայացնելը խորհուրդ է հարցնում կոկայի տերեւներից:Դատավոր Գուալբերտո Կուսին ազգությամբ այմար է, եւ նա ընդամենը հետեւում է ավանդույթին: Դատավորը հստակեցրել է, որ հոգեւոր առաջնորդություն է ստանում տերեւներից, բայց դատավճիռներ կայացնելիս այդ միջոցի վրա չի հիմնվում: Կուսին հավելել է, որ կոկան օգնում է հաղորդակցվել կենդանիների, լեռների եւ գետերի հետ, հաղորդում է BBC-ն:
Դատավորն իր խոստովանությունից հետո կոշտ քննադատության է ենթարկվել, բայց չի պատրաստվում հրաժարական տալ նման ինքնաբացահայտումից հետո:
Հարկ է նշել, որ կոկայի տերեւների ակտիվ պաշտպանը եւ այն աճեցնելու ու բնական տեսքով կիրառելու կողմնակից է նաեւ Բոլիվիայի նախագահ Էվո Մորալեսը: Ճիշտ է, նա կտրականապես դեմ է կոկաինի արտադրությանը:
Անդի հնագույն ժողովուրդները կոկայի տերեւները հազարամյակներ ի վեր կիրառում են իբրեւ թեթեւ գրգռիչ միջոց, դեղամիջոց, ինչպես նաեւ կրոնական ավանդական ծիսակարգերում:
