Առողջապահության նորանշանակ նախարար Արսեն Թորոսյանը երեկ կառավարության նիստից հետո լրագրողների հետ զրույցում ասաց, որ դեղերը դեղատոմսերով տրամադրելու հարցը քնարկվում է։ Դեռ որոշ մանրամասներ պետք է ճշտվեն։

«Երկու նյուանս է մնացել, որ ճշտենք մասնագիտական շրջանակների հետ, եթե ամեն ինչ իմ մտածած պլանով գնա՝ հավանաբար հուլիսի 1—ից եւ աշնանից մտնող ցանկերի մասով մեկ տարով երկարացում կլինի»,—նշեց նախարարը։

Իսկ ինչ վերաբերում է հակաբիոտիկներին, ապա դրանց՝ դեղատոմսով դուրս գրելը կարծես ուժի մեջ է մնում։ «Անկեղծ ասած, հակաբիոտիկների մասով մասնագետները հակված են թողնել ուժի մեջ, քանի որ դրա չարաշահումն ավելի լուրջ խնդիր է»,–նախարարը խոստացավ որոշման մասին հավելյալ տեղեկացնել։

Լրագրողներիս հետաքրքրում էր նաեւ, թե ի՞նչ ճակատագիր կունենա ծխելու դեմ պայքարի նախագիծը։ Հարցին պատասխանելուց առաջ Արսեն Թորոսյանը նախ խնդրեց չանձնավորել հարցը, քանի որ առողջապահության յուրաքանչյուր նախարար պարտավոր է մտածել իր քաղաքացիների առողջության մասին։ Իսկ պատասխանը հակիրճ էր. «Դա (ծխելու դեմ պայքարը,—Ա.Մ.) Հայաստանի ստանձնած միջազգային պարտավորությունների շրջանակում է»։

Իսկ ի՞նչ տեսակետ ունի նորանշանակ նախարարը ծխելու հետեւանքով (ծխելու համար չսահմանված վայրերում) տուգանքների մասին։ «Այդ տուգանքները պետք է լինեն կանխարգելող, բայց նաեւ՝ չվախեցնող»,–հետեւեց պատասխանը։

Արմենուհի ՄԵԼՔՈՆՅԱՆ