Դեղագործության և քիմիական ոլորտներում գործունեություն ծավալող գերմանական Bayer ընկերության բաժնետոմսերի գինը Ֆրանկֆուրտի ֆոնդային բորսայում ընկել է 9.8%-ով, այն բանից հետո, երբ ամերիկյան դատարանը Monsanto ընկերության դեմ հայցում ընդունել է որոշում՝ այգեպան Դուէյն Ջոնսոնի օգտին:

Այգեպանը պնդել է, որ ստացել է ուռուցքաբանական հիվանդություն (ոչ Հոջկինի լիմֆոմա) այն պատճառով, որ աշխատանքի մեջ օգտագործել է մոլախոտեր ոչնչացնող, Monsanto-ի արտադրության Roundup-ը, որի բաղադրության մեջ գլիֆոսատ է պարունակվում: Կալիֆոռնիայի դատական համակարգը Monsanto-ին պարտավորել է վճարել այգեպան Ջոնսոնին 298 մլն ԱՄՆ դոլար՝ որպես նրա առողջությանը հասցված վնասի փոխհատուցում:

Բժիշկների կանխատեսումներով Ջոնսոնը, լավագույն դեպքում, կապրի մինչև 2020թ-ը:

Financial Times-ը գրում է, որ դատարանի որոշումն անհանգստություն է առաջացրել Bayer-ի ներդրողների շրջանում, և նշենք, որ ընկերությունը հունիսին արդեն մարել է ամերիկյան ագրոարտադրող Monsanto ընկերության ձեռքբերման հետ կապված պարտքը՝ 63 մլրդ ԱՄՆ դոլար:

Ընդհանուր առմամբ, պարարտանյութեր և սերմեր արտադրող Monsanto ընկերության նկատմամբ ԱՄՆ-ում ներկայացվել է ավելի քան 5000 նման հայց:

Ընկերության ներկայացուցիչները դատարանում հայտարարել են, որ ավելի քան 800 գիտական հետազոտություններ հաստատում են, որ գլիֆոսատը չի առաջացնում ուռուցքաբանական հիվանդություններ և դատարանի որոշումն այս փաստը փոխել չի կարող:

Նշենք, որ 2017թ սեպտեմբերին ԱՄՆ Շրջակա Միջավայրի Պահպանության Գործակալությունն երկար հետազոտություններից հետո հայտարարել է, որ գլիֆոսատը չի առաջացնում քաղցկեղային հիվանդություններ: Այնուամենայնիվ, Համաշխարհային Առողջապահության կազմակերպության կառուցվածքում ընդգրկված Քաղցկեղի Հետազոտության միջազգային գործակալությունը 2015թ գլիֆոսատը դասակարգել է որպես նյութ, որը կարող է քաղցկեղածին ազդեցություն ունենալ մարդու օրգանիզմի վրա:

Պատրաստեց Նարե Հարությունյանը