Դեղերի նկարագրություն
Նախատեսվում է պոլիկլինիկաներում ներդնել դեղամիջոցների գնման նոր մեխանիզմ
Նախատեսվում է պոլիկլինիկաներում ներդնել դեղամիջոցների գնման նոր մեխանիզմ: Այս մասին հոկտեմբերի 18-ին լրագրողներին հայտնեց առողջապահության նախարարի պաշտոնակատար Արսեն Թորոսյանը՝ մեկնաբանելով այն գանգատներին վերաբերող տեղեկությունները, որ որոշ պոլիկլինիկաներում մինչեւ 7 տարեկան երեխաները չեն կարողանում անվճար դեղեր ստանալ:Թորոսյանն ընդունեց, որ երբեմն նման իրավիճակ տեղ է գտնում նաեւ այն մեծահասակ հիվանդների դեպքում, որոնք ըստ օրենքի նույնպես անվճար դեղեր ստանալու իրավունք ունեն: Նրա խոսքով, սակայն, սա ավելի շուտ համակարգային խնդիր է, քանի որ հաճախ դեղորայք մատակարարողները մրցույթներին չեն մասնակցում, եթե այս կամ այն պոլիկլինիկայի հայտավորած դեղերի խմբաքանակը շատ փոքր է ֆինանսապես ձեռնտու լինելու տեսակետից:
«Ստացվում է, որ պոլիկլինիկան պարտավոր է հիվանդին դեղ տրամադրել, սակայն այն չունի: Սրա հետ կապված մենք նոր մեխանիզմ ենք մտահղացել, որը նախատեսում ենք փորձարկել: Դրա համաձայն՝ պոլիկլինիկաները միավորվելով կկարողանան իրականացնել հավաքական գնումներ: Սա կմեծացնի գնվող դեղորայքի քանակությունը, ինչը, բնականաբար, մատակարարներին կգրավի մասնակցելու մրցույթներին»,- հայտնեց Թորոսյանը:
Ընդ որում՝ նախարարի պաշտոնակատարը չհապաղեց նշել, որ վերջին երեք ամիսներին Երեւանի պոլիկլինիկաներում հիվանդներին անվճար դեղեր տրամադրելու հետ կապված իրավիճակը մի փոքր բարելավվել է: Թորոսյանը կոչ արեց խնդիրներ առաջանալու դեպքում զանգահարել նախարարության թեժ գծին:
